Міжнародны саюз беларускіх пісьменнікаў

Міжнародны саюз беларускіх пісьменнікаў (скарочана — МСБП) — некамерцыйная недзяржаўная арганізацыя, заснаваная ў 2022 годзе ў Вільні (Літва). Мэты арганізацыі — пашырэнне прасторы беларускай літаратуры ў свеце, інфармаванне беларускіх літаратараў і грамадскасці, абарона аўтарскага права, арганізацыя літаратурных івэнтаў, адукацыйных праектаў у сферы літаратуры і літаратуразнаўства як у Беларусі, так і па-за яе межамі.

Арганізацыя паўстала з ініцыятывы пісьменніка і перакладчыка Дзмітрыя Плакса, які не адзін дзясятак гадоў займаецца прамоцыяй беларускай літаратуры ў Еўропе, найперш – у скандынаўскіх краінах. З прычыны ўскладненасці сітуацыі ў Беларусі і эміграцыі многіх беларускіх літаратараў паўстала задача гуртавання і кансалідацыі літаратурных сілаў, вынікам чаго стала заснаванне Міжнароднага саюзу беларускіх пісьменнікаў. На дадзены момант арганізацыя існуе як НДА, развіваючы свае каналы камунікацыі і працуючы над рэалізацыяй пастаўленых мэтаў, але пакуль што не прадугледжвае працэдуры прыняцця ў сябры арганізацыі, працы прыёмнай камісіі; гэта з’яўляецца задачай на больш далёкую перспектыву. Тым не менш, МСБП адкрыты для прапаноў і новых ідэй ад усіх беларускіх літаратараў, незалежна ад узросту і месца пражывання.